Plantun de Prouvènço

Pèr coumpara dos planto d'encò nostre

Eschscholzia californica & Chrozophora tinctoria

Eschscholzia californica

Papaveraceae

Nom en français : Pavot de Californie.

Descripcioun :
Lou pavot-de-Califournìo se rescontro d'aqui e d'eila dins lis escoumbre e lis ermas proche d'oustau. Es un poulit pavot fourestié emé de gràndi flour jauno o aranjado e de fueio que dounon d'èr à-n-aquéli di fumo-terro. Lou fru (boursèu) se raprocho de li de l'erbo-dóu-faiò.

Usanço :
Estènt un pavot, a d'usanço proche de Papaver somniferum, pamens en mens fort (e sa culturo es autourisado). Es un remaiso doulour, ajudo à dourmi e èi bon contro lis ànçi. Ei bessai manjadis, coume lis àutri pavot, mai n'en sabèn pas rèn.

Port : Erbo
Taio : 20 à 60 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Eschscholzia
Famiho : Papaveraceae

Ordre : Ranunculales

Coulour de la flour : Aranjado
Petalo : 4
Ø (o loungour) flour : 4 à 4,5 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Escoumbre e proche dis oustau - Ermas
Estànci : Termoumediterran à Coulinen
Couroulougi : Óurigino Califournìo
Ref. sc. : Eschscholzia californica Cham., 1820

Maurello

Chrozophora tinctoria

Euphorbiaceae

Noms en français : Tournesol des teinturiers, Croton des teinturiers.

Descripcioun :
La maurello es uno Euphorbiaceae que douno d'èr pulèu à l'erbo-di-toro, Heliotropium europaeum, subretout que trachis dins li champ e flouris peréu à la fin de l'estiéu. Li flour masclo e femello soun desseparado. Se recounèis à si fru en boulo, cubert de berrugo e à si péu estela (fotò).

Usanço :
Emé la planto se fasié la tenchuro de viro-soulèu que servié à l'Age-Mejan à l'enluminamen di libre e tambèn pèr acoulouri lou manja. D'efèt chanjo de coulour, passo de blu à rouge, quouro lou mitan es acide (pèr acò se boutié li boursèu dins la pisso). Acò se retrobo dins lou papié Tournesol qu'utiliso la chimìo.